Farsóttarøkið: Eru ikki samd um alt

Danska heilsumálaráðið og tað føroyska eru ikki samd um alt, nú farsóttarmálsøkið skal yvirtakast.

Danska heilsumálaráðið vil hava lógina meira nágreiniliga, men landsstýrið heldur, at hon er nóg greið, so lógaruppskotið er ikki broytt tí viðvíkjandi. 

Danska heilsumálaráðið heldur millum annað, at tað eigur at vera nágreinað, at heimildir, sum eru hjá donskum myndugleikum sambært aðrari lóggávu, ikki eru við í yvirtøkuni. 

Landsstýrið heldur ikki, at tað er neyðugt, tí tað er greitt, at lógaruppskotið bara er um farsóttarmálsøkið og ikki um aðra lóggávu. 

Landsstýrið heldur ikki, at tað er rætt at samráðast við danska verjumálaráðið um, hvørjir lættar skulu vera fyri orlógsskip og herskip. 

Tað avgera føroyingar einsamallir, heldur landsstýrið, tí málsøkið verður yvirtikið.