Smyril fer aftur í sigling 3. oktober

Suðuroyingar kunnu gleða seg til 3. oktober, tí tað eru rættuliga góð útlit fyri, at tíðarætlanin fyri dokkingina av Smyrli fer at halda, og at hann er aftur í sigling í seinasta lagi tá.

Sambært dagførdari kunning frá verkætlanarleiðsluni fyri dokkingina, hevur stórt sæð alt gingið eftir ætlan, hóast okkurt arbeiði er komið afturat tí, sum upprunaliga var ætlan at gera. 

Millum annað eftir áheitan frá klassanum, sigur Dánjal Samuelsen, samferðsluleiðari á Strandferðsluni.

Stórarbeiði

Talan hevur verið um stórarbeiði í sambandi við motorar, elektriskar skipanir og akslar og skrúvur.

Á ferðafólkaøkinum hevur skipið fingið eina sonevnda “yvirháling”. 

Millum annað eru borð í salóngini/kafeteria skift út, teppir og veggir eru umvæld ella skift, nýtt spælipláss er gjørt, øll uttara skipssíðan og bildekkið eru málað, og rútar eru skiftir upplýsir Strandferðslan.