Smuglaðu rúsevni við Norrønu til Íslands

Í Íslandi eru ein mamma og tannáringasonur hennara handtikin fyri at smugla rúsevni við Norrønu.

Umleið tvey kilo av amfetamini og kokaini vóru funnin í einum kufferti, tá ið Norrøna kom á Seyðisfjørð týsdagin í síðstu viku. 

Tað boðar løgreglan á eysturlandinum frá.

Mamman er um 40 ára aldur og sonurin hennara er 16 ára gamal. 

Bæði eru varðhaldsfongslað í málinum til í morgin. 

Av tí at drongurin er so ungur, situr hann í varðhaldi á einum stovni fyri ung, skrivar íslendska kringvarpið, RÚV.