Stórur prísvøkstur í Evropa

Inflatiónstølini í Evropa eru gjørd upp fyri august. Tjóðbankin upplýsir, at baltisku londini eru serliga hart rakt av vaksandi inflatión, meðan Sveis liggur í hinum endanum.

Inflatiónin í Estlandi var heili 25,2 prosent í august. Inflatiónin í Letlandi og Litava var ávikavist 21,4 og 21,1 prosent.

Í Sveis var inflatiónin harafturímóti 3,3 prosent.

Kim Blindbæk, sum er búskaparfrøðingur í danska Sydbank, sigur við TV2, at orsøkin til lutfalsligu lágu inflatiónina í Sveis er tann, at sveisiski frankurin er hækkaður nógv mótvegis evruni, og landið hevur ikki tørv á so nógvari innfluttari orku sum onnur evropeisk lond.

Ísland er næstniðast á listanum yvir tey lond, sum høvdu hægstu innflatiónina í august, við 5,5 prosentum.

Í Føroyum verða inflatiónstølini gjørd upp fyri hvønn ársfjórðing. Seinasta uppgerðin vísti, at okkara inflatión frá apríl til juni var góð sjey prosent.