Innlandsísurin bráðnar skjótari enn hildið

Meðan heimsins leiðarar kjakast um, hvat skal gerast fyri at minka um útlátið av veðurlagsgassum til COP27 ráðstevnuna í Egyptalandi, vísir ein nýggj vísindalig kanning, at man higartil hevur undirmett, hvussu skjótt innlandsísurin í Grønlandi bráðnar.

Tí niðurstøðan í kanningini er, at í støðum bráðnar ísurin seks ferðir skjótari enn áður hildið.

Kanningin er útgivin í tíðarritinum Nature, og tað eru millum annað granskarar á DTU Space, sum hava staðið fyri kanningini. 

Shfaqat Abbas Khan, sum er professari á DTU Space sigur sambært danska kringvarpinum, at tey eru bilsin av niðurstøðunum. 

- Vit vistu, at ísurin bránaði skjótari, enn tað roknað var við, men eg vónaði, at tað í ringasta føri var tvífalt so nógv sum hildið, men at talan nú er um eina seksfalding er ørkymlandi, sigur Khan.

Nýggja kanningin staðfestir eisini, at ísurin bráðnar langt inni í landinum, og ikki bert úti við strendurnar.

Hóast kanningin er gjørd við støði í landnyrðingsgrønlandi, so heldur Khan, at úrslitini kunnu yvirførast til onnur støð, eitt nú suðurpólin, har ísbráðningin helst eisini er undirmett. 

At ísurin bráðnar so nógv skjótari merkir, at vatnstøðan í høvunum eisini hækkar skjótari.

- Samlaða vatnstøðan hækkar í øllum førum ein metur fram til 2100, men nú skulu vit kanna neyvari, hvussu nógv tað verður, sigur Shfaqat Abbas Khan.