Vil hava ST at steðga álopum á infrakervið

Ukrainski forsetin, Zelenskyj, vil hava ST at steðga russisku alopunum á infrakervið í Ukraina, tí álopini hava eittans endamál, og tað er at gera tað óliviligt í landinum, skrivar Ritzau.

Tað segði forsetin í eini røðu fyri trygdarráðnum hjá ST, sum var kallað saman í skundi, eftir ógvuslig russisk álop í gjár.

Russland skeyt rakettir inn í høvuðsstaðin, Kyiv. Fýra fólk lógu eftirá, og álopini høvdu eisini við sær, at næstan eingin í høvuðstaðnum longur hevur atgongd til el og vatn.

Eigur at missa vetorættin

Forsetin segði røðuni, at ukrainar vænta ógvuslig tiltøk frá heimsins londum eftir tað, sum hendi í gjár.

Zelenskyj mælti eisini til, at Russland, sum hevur vetorætt í trygdarráðnum, skal ikki sleppa at atkvøða um mál. sum hava við framferðina hjá Russlandi at gera í Ukraina.

Russiski ST-sendiharrin, Vasilij Nebenzia, vísti øllum ákærum frá Ukraina og londunum í vesturheiminum aftur.