Samgongan er skipað

Aksel V. Johannesen, samráðingarleiðari, váttar, at samgongusamráðingar eru lidnar, og teir tríggir flokkarnir, Javnaðarflokkurin, Tjóðveldi og Framsókn, eru samdir um bæði samgonguskjalið og málsøkjabýtið. 

Harvið er ein nýggj samgonga skipað. 

Aksel V. Johannesen vil ikki siga, um tað eru átta ella níggju landsstýrisfólk í nýggja landsstýrinum, men sum Kringvarpið skilir, so vera tað níggju. 

Alt bendir tískil á, at Javnaðarflokkurin fær løgmann og trý landsstýrisfólk, og at Framsókn fær fíggjarmál og møguliga eitt landsstýrisfólk afturat. 

Tjóðveldi fær løgtingsformannin og eftir øllum at døma trý landsstýrisfólk. 

Samgongusamráðingar 2022, á kvøldið, Ruth Vang

Ruth Vang, forkvinna í Framsókn, hevur kravt at fáa eina góða umboðan í landsstýrinum, nú flokkurin hjá henni endaði við buktini og báðum endunum. 

Nú er alt, ið bendir á, at Framsókn fær tvey landsstýrisfólk, og annað er landsstýrisfólkið í fíggjarmálum. 

Tíðindafundur hósmorgunin

Samgonguskjalið verður tó ikki kunngjørt fyrr enn hósmorgunin, tí nú fara flokkarnir at brúka morgindagin til innanhýsis fundir, har tey millum annað skulu finna út av, hvør skal umboða flokkarnar í landsstýrinum.  

Hósmorgunin verður tíðindafundur, har samgonguskjalið og málsøkjabýtið verða kunngjørd. 

Klokkan tíggju hósmorgunin verður tingfundur, har løgtingsformaður skal veljast, og síðani skal Aksel V. Johannesen veljast til løgmann. 

Men landsstýrisfólkini verða ikki kunngjørd, fyrr enn løgmaður hevur móttøku í Tinganesi seinnapartin hósdagin.