Dregur út at manna tingnevndirnar

Tað dregur út at manna tær sjey løgtingsnevndirnar, sum skulu veljast eftir sambært tingskipanini.

Tingfundur var settur klokkan 11, men tá var eftir øllum at døma einki greitt, tí tingfundurin var niðurlagdur til klokkan 13.

Síðani er hann niðurlagdur fleiri ferðir, og tað nýggjasta er, at fundurin skal takast uppaftur klokkan 16.45.

Samgongan og andstøðan hava skipað hvør sín valbólk at velja nevndir, og semja er eisini um, hvussu teir 45 nevndarsessirnir í teimum sjey føstu nevndunum skulu býtast.

M.a. er greitt, at Javnaðarflokkurin fær formanssessin í Fíggjarnevndini og Uttanlandsnevndini, og at Tjóðveldi fær formanssessin í Rættarnevndini.

Sambandsflokkurin fær formanssessin í Vinnunevndini, og Fólkaflokkurin fær formannin í Trivnaðarnevndini.

Men enn er ikki greitt, hvør skal manna nevndirnar.