Samd um at býta nevndarsessirnar

Samgongan og andstøðan eru samd um yvirskipaða býtið av teimum tilsamans 45 sessunum í teimum sjey føstu løgtingsnevndunum, men bíðað verður framvegis eftir, hvør skal manna nevndirnar.

Tingfundurin er niðurlagdur fleiri ferðir, og nú er ætlanin at taka fundin uppaftur klokkan 16 við nevndarvali á skránni.

Sambært semjuni fær Javnaðarflokkurin formannin í Fíggjarnevndini og Uttanlandsnevndini.

Tjóðveldi fær formanssessin í Rættarnevndini, og Framsókn fær væntandi formanssessin í Mentanarnevndini. 

Samgongan fær væntandi eisini formannin í Landsstýrismálanevndini.

Vinnunevnd og Trivnaðarnevnd

Andstøðan fær tveir formanssessir.

Sambandsflokkurin fær formansskapin í Vinnunevndini, og Fólkaflokkurin fær formansskapin í Trivnaðarnevndini.  

Miðflokkurin fær tríggjar nevndarsessir, men ongan formanssess. Tó verður roknað við, at Miðflokkurin fær ein serligan leiklut í Útnorðurráðnum. 

Samgonguflokkarnir bjóðaðu Miðflokkinum at skipa valbólk saman við samgonguni, nú nevndirnar skulu mannast, men tað verður kortini av ongum.

Hoyr samrøðu, sum Jón Brian Hvidtfeldt gjørdi við Jenis av Rana, formann í Miðflokkinum:

Løgtingið 2023, Jenis av Rana, Steffan Klein Poulsen, MIðflokkurin

Steffan Klein Poulsen og Jenis av Rana umboða nú Miðflokkin á tingi. (Mynd: Bjarni Árting Rubeksen)