Noyðast at taka hybridbilarnar úr lógini fyribils

Ongin tingfundur verður í dag kortini.

Fyrsti vanligi tingfundurin síðani løgtingsvalið skuldi vera seinnapartin í dag, men hann er útsettur til týsdagin.

Ruth Vang, landsstýriskvinna í fíggjarmálum, skuldi leggja fram uppskot um at leingja tíðarskeiðið við tveimum árum, har fólk fáa meirvirðisgjaldið aftur, tá tey keypa nýggjan el-bil.

Samgongusamráðingar 2022, dagur 8, Ruth Vang

Ruth Vang, landsstýriskvinna í fíggjarmálum, var ikki klár at leggja uppskotið um elbilar og meirvirðisgjald fyri tingið í dag. (Mynd: Bjarni Árting Rubeksen)

Má broytast

Ruth Vang sigur, at uppskotið mátti broytast í síðstu løtu, av tí at landið í løtuni hevur bráðfeingisfíggjarlóg. Orsøkin er tí lógarteknisk, og eingin ósemja er um uppskotið, sigur hon.

Ítøkiliga merkir tað, at broytingin, sum nýggja landsstýrið ætlaði at gera, soleiðis at hybridbilar og plug-in hybridbilar frá 1. juli ikki longur fáa endurrindað meirvirðisgjald, má bíða, til endaliga fíggjarlógin fyri í ár er komin í gildi.

Lógartekniskt hevði tað verið í stríð við bráðfeingisfíggjarlógina at taka hesar bilarnar úr lógini nú.

Ætlanin óbroytt

Landsstýriskvinnan sigur tó, at hóast hybridbilar og plug-in hybridbilar ikki vera við í uppskotinum, sum verður lagt fram á tingfundinum týsdagin, broytir tað ikki politisku ætlanirnar, at hesir bilarnir frá 1. juli at rokna ikki longur fáa endurrindað meirvirðisgjaldið.

Hitt málið, sum skuldi leggjast fram í dag, er yvirtøka av farsóttarmálsøkið

Tað verður sama uppskot, sum undanfarna landsstýri kom við í løgtingið.