Elbilar: Váðameting má gerast fyri hvørt skip

Áðrenn elbilar og hybridbilar vera tiknir um borð á skip, má reiðaríið greina og taka støðu til teir serligu vandar, sum kunnu standast av at hava el-battarí á bildekkinum. 

Fyri hvørt skip skal gerast ein serlig váðameting, sum sigur, hvar bilarnir skulu setast og møguliga løðast, og eld- og rýmingartilbúgvingin umborð skal lýsast.

Tað sigur Sjóvinnustýrið í einari vegleiðing um elbilar og skip.

Norrøna, Smyril Line

Norrøna. (Mynd: Bjarni Árting Rubeksen)

Verri at sløkkja

Royndir siga, at avbjóðingarnar at sløkkja battaríeldar um borð á skipum eru størri, enn tær eru á landi.

Hóast eldur í el-bilum er sjáldsamari enn í øðrum bilum, eru battaríeldar torførir at sløkkja.

Og teir kunnu kykna aftur langa tíð eftir at teir, at vísa seg, eru sløktir. 

Eitt brennandi battarí kann eisini lata frá sær eitrandi gass, sum kann gera sløkkiarbeiðið á dekkinum trupult.

Strandferðslan, Smyril

Smyril (Mynd: Bjarni Árting Rubeksen)

Ikki klárt við altjóða reglum

Vitanin á økinum er vaksandi, men enn er IMO, sum er sjóvinnufelagskapurin hjá ST, ikki klárt við altjóða reglugerðum ella leiðbeining á økinum, sigur Sjóvinnustýrið. 

EMSA, sum er maritimi trygdarstovnurin hjá ES, gjørdi í fjør eina vegleiðing.

Á heimasíðuni hjá Sjóvinnustýrinum eru vegleiðingar um elbilar og hybridbilar og eldsløkking um borð á skipum.

Sí vegleiðingina her.