Alda Mohr Eyðunardóttir fekk Virðisløn til ungt listafólk

Á hátíðarløtu í Hátúni í Tórshavnar Musikkskúla í kvøld handaði Sirið Stenberg, landsstýriskvinna í mentamálum, Aldu Mohr Eyðunardóttir Virðisløn landsins til ungt listafólk

Alda Mohr Eyðunardóttir

Mynd: Bjarni Árting Rubeksen

Uni L. Hansen

22.02.2023 - 19:13

Virðislønin til ungt listafólk fyri 2022 varð í kvøld handað listakvinnuni Aldu Mohr Eyðunsdóttir.

Virðisløn til ungt listafólk er 50.000 kr., og hon verður latin ungum, sum hevur víst serliga góðar gávur og fyri at eggja til framhaldandi virksemi og menning.

alda.jpg

Alda Mohr Eyðunsdóttir hevur seinastu árini rættiliga gjørt vart við seg sum listakvinna, og hon er ein av teimum fáu at koma gjøgnum nálareygað til kongaliga danska listaháskúlan, har hon nú nemur sær masterútbúgving.

Alda Mohr Eyðunardóttir

Í grundgevingini fyri at lata Aldu Mohr Eyðunsdóttir Virðislønina til ungt listafólk stendur millum annað:

"Alda Mohr Eyðunardóttir er hugtikin av handarbeiði og brúkar tað á ymiskan hátt í sínari list, bæði við at tilevna tekstilverk við hond og at endurgeva tekstil í øðrum miðlum.

Tilfarið í listini hevur tilsipingar til føroyska mentan og handverk, millum teirra at veva, til fiskireiðskap og seyðaull. Hon er partur av einum ættarliði, har tilgongdin til handverkið er øðrvísi, og sambært ungu listakvinnuni er hetta eisini ein fyrimunur, tí verkini kunnu kennast meira erlig og beinleiðis."

Alda Mohr Eyðunardóttir fekk í 2020 eisini gávugóðs Thorvalds Poulsen av Steinum.