Vit spæla føroyskt

Aftur í ár fer útvarpið at spæla føroyskan tónleik burturav í eina heila viku, og í Góðan morgun Føroyar fara lurtararnir hjá KVF at velja "Ársins útvarpshitt 2023". 

Í ár fer Tónleikasamband Føroya at samskipa fleiri konsertir, framløgur, felagssang o.a. kring allar Føroyar, sum kommunur, skúlar, stovnar, fyritøkur, konsertfyriskiparar o.o. fara at skipa fyri í "Spæl føroyskt"-vikuni. Skráin verður send út, tá vikan nærkast. 

Sum nakað nýtt verða "Spæl føroyskt-tíðindi" dagliga í útvarpinum eftir høvuðstíðindi og kunngerðir á døgurða. Eyðfinn Jensen verður vertur í sendingini, sum fer at varpa ljós á tónleikatiltøk og (ókeypis) konsertir í vikuni við samrøðum og tónleiki. 

fma_23-41.jpg

Mynd: Bjarni Árting Rubeksen

Hita upp til FMA

Endabrakið í "Spæl føroyskt"-vikuni er FMA (Faroese Music Awards) í Norðurlandahúsinum, har føroyskur tónleikur verður fagnaður og heiðraður. FMA verður sent beinleiðis í sjónvarpinum leygarkvøldið tann 9. mars. 

Samrøður, hugskot og prei til "Spæl føroyskt"-vikuna eru vælkomin, eins og vit fegin svara øllum spurningum.  

Spurningar um FMA og um konsertir og tiltøk í "Spæl føroyskt"-vikuni kunnu sendast til: Siri S. Hansen, nevndarlimur og skrivari í Tónleikasambandi Føroya: siri@musikk.fo, tel. 508408. 

Spurningar í sambandi við"Spæl føroyskt"-vikuna og "Ársins útvarpshitt" kunnu sendast til: Eyðfinn Jensen, tónleikasamskipari í KVF: eydfinn@kvf.fo, tel. 296674.