Einki danskt verjuskip við Føroyar fyribils

Fram til miðjan mars verður einki danskt verjuskip undir Føroyum.

Tað sigur danski verjumálaráðharrin Troels Lund Poulsen í svari til Sjúrð Skaale, fólkatingsmann, sum spurdi verjumálaráðharran, um hann metir tað vera nóg trygt, at eingi skip hjá donsku sjóverjuni eru tøk kring Føroyar í løtuni.

Tekniskir trupulleikar á tveimum av verjuskipunum í Knud Rasmussen-klassanum hjá donsku sjóverjuni í Grønlandi fyrr í mánaðinum gjørdu, at Arktisk Kommando noyddist at flyta Hvidbjørnen, sum vanliga varðar um føroyska sjóøkið, til Grønlands.

Fregatt kemur um hálvan mars

Danska sjóverjan hevur í løtuni einki annað skip tøkt til føroyska økið.

Men Troels Lund Poulsen sigur, at arbeitt verður í fyrstu atløgu við at fáa eina fregatt í Iver Huitfeldt-klassanum til Føroya um miðjan mars, og at eitt Thetis-skip seinni fer at røkja uppgávurnar við Føroyar.

Danski verjumálaráðharrin sigur í svarinum til Sjúrð Skaale, at hann hevur álit á, at danska verjan røkir sínar uppgávur í Norðuratlantshavi, og at verjan hevur fleiri aðrar møguleikar, ið kunnu setast inn eftir tørvi.