Handverksmeistarar kæra avgerð hjá Kappingarráðnum

Málið snýr seg um útbjóðingartilfar í sambandi við at byggja svimjihøll í Runavík

Kappingarráðið sigur, at Føroya Handverksmeistarafelag hevur brotið kappingarlógini við at noktað sínum limum at bjóða uppá arbeiðið av svimjihøllini í Runavík. (Savnsmynd)

Johnsigurd Johannesen

11.03.2024 - 14:11

Føroya Handverksmeistarafelag fer at kæra avgerðina hjá Kappingarráðnum, um at handverksmeistarafelagið og nakrir limir í felagnum skulu hava brotið kappingarlógina.

Málið snýr seg um, at Føroya Handverksmeistarafelag í 2020 mælti undangóðkendum fyritøkum frá at bjóða uppá arbeiðið at gera eina svimjihøll í Runavík, tí útbjóðingartilfarið, sambært felagnum, var ikki í lagi.

Nevndin í felagnum hevur viðgjørt niðurstøðuna hjá Kappingarráðnum, og hevur avgjørt at kæra. Nevndin er ósamd og heldur, at fortreytirnar hjá Kappingarráðnum at gera niðurstøðuna eru skeivar.

Føroya Handverksmeistarafelag sigur, at felagið ger ikki fleiri viðmerkingar til málið, fyrr enn ein endalig niðurstøða fyriliggur.

Les avgerðina hjá Kappingarráðnum her.