Boksaðu seg til tvey gull

Føroysku nevaleikararnir Teitur Annand Berg og David Kunoy vunnu sínar dystir á altjóða boksistevnuni Hvidovre Cup 2024 um vikuskiftið, skrivar portal.fo.

Triðji føroyingurin, Andreas Dam Poulsen, tapti sín dyst greitt.

Teitur Annand Berg vann ein sannførandi sigur á onglendinginum, Dion Clock. Føroyski boksarin úr Tórshavn Boksing var betri og vann greitt upp á stig.

David Kunoy var noyddur at arbeiða hart fyri at vinna sín dyst ímóti sterka mótstøðumanninum frá Sydhavsøerne. Føroyingurin vann upp á sokallaða split decision. Tveir dómararm mettu, at David Kunoy skuldi vinna, meðan triðji dómarin var ósamdur.

Andreas Dam Poulsen var tvær ferðir til teljing ímóti mótstøðumanni, sum vigaði nærum 15 kilo meir enn føroyingurin. Aðru ferð valdi venjarin at steðga dystinum.

11 lond og 300 boksarar boksaðu á stóru stevnuni.