Føroya Tele og Nema tendra 5G 15. apríl

Avtalan millum Føroya Tele og Nema fevnir um javnbjóðis atgongd til sendistøðirnar, sum Føroya Tele eigur og rekur

Arbeiðið hjá Føroya Tele at skifta alt farnetið frá Huawei til Ericsson var liðugt um ársskiftið. Tá varð Nema eisini knýtt upp í sendistøðirnar hjá Føroya Tele. (Savnsmynd)

Frants Jensen

22.03.2024 - 15:28

Mánadagin 15. apríl fáa viðskiftafólk hjá Føroya Tele og viðskiftafólkini hjá Nema atgongd til 5G. Tá verður alment tendrað fyri nýggju farnettøknini, skriva Føroya Tele og Nema í hvør sínum tíðindaskrivi

5G-farnetið gevur nógv størri ferð enn 4G-netið. Tað merkir, at tú kanst taka appir, filmar og annað skjótari niður á telefonina. Eisini har nógv fólk eru saman.

Arbeiðið hjá Føroya Tele at skifta alt farnetið frá Huawei til Ericsson var liðugt um ársskiftið. Tá varð Nema eisini knýtt upp í sendistøðirnar hjá Føroya Tele.

Avtalan millum Føroya Tele og Nema fevnir um javnbjóðis atgongd til sendistøðirnar, sum Føroya Tele eigur og rekur.

Veitararnir hava atgongd til sama dekning, somu ferð og sama kapasitet, men samstarvið fevnir ikki um kjarnutøknina, sum stýrir produktum og tænastum. Hetta tryggjar framhaldandi kapping á marknaðinum, siga telefeløgini.