Verjuskip kunnu loysa aftur

Síðani hálvan februar hava tvey av donsku sjóverjuskipinum ligið í havnini í Nuuk við maskinbreki í einum av hjálpimotorunum.

Men nú kunnu Lauge Koch og Ejnar Mikkelsen loysa aftur. 

Tað skrivar Arktisk kommando á Facebook.

Sjóverjuskipið Hvidbjørnin fór úr Føroyum til Grønlands at røkja eftirlitsuppgávurnar og veita hjálp í økinum kring Grønland hesa tíðina.

Hvidbjørnen hjálpti m.a. tá ið trolarin hjá Royal Greenland, Lomur, sakk við Sisimiut leygardagin, skrivar grønlendska kringvarpið KNR.

Eisini tvey gomul skip av Thetis-slagnum vóru send til Grønlands, men tey fingu eisini trupulleikar - av tekniskum slagi, og máttu til umvælingar.

Í frágreiðing, sum danska kringvarpið hevur fingið innlit í frá Verjumálaráðnum, stendur, at nógvir trupulleikar eru við skipunum, og tí er torført hjá Arktisk kommando at røkja uppgávurnar.

Í Grønlandi er tað ikki farið aftur við borðinum, at sjóverjuskipini hava ligið við bryggju. 

Forkvinnan fyri uttanríkis- og trygdarpolitisku nevndini í Grønlandi, Mariane Paviasen út flokkinum Inuti Atagatiigiit, krevur, at íløgar verður gjørd í nýggj og nútímans skip, sum kunnu hava eftirlit við havleiðunum kring Grølnad og verja landið við eldmegi og kanónum - um neyðugt, skrivar KNR.

Hetta segði hon, tá ið danski verjumálaráðharrin Troels Lund Poulsen var á vitjan í Nuuk. 

Hann vildi tó ikki siga neyvt, nær nýggj skip verða klár, - men tey koma.

- Thetis-slagið hevur nógv ár á baki. Vit mugu kanna, nær vit skulu skifta tey fýra skipini. Tað fara vit at kjakast um, tá vit seinni í vár skulu hyggja nærri at nýggjari styrki á verjuøkinum, segði Troels Lund Poulsen við KNR.