Stórsigur móti Liktinstein

Liktinstein er eitt av liðunum, sum Føroyar dáma væl at spæla ímóti, tí undan dystinum í gjár høvdu londini møtst sjey ferðir, og Føroyar hava vunnið hvørjaferð.

Tað broyttist ikki eftir dystin í Marbella í Spania í gjár, tí Føroyar vunnu enn einaferð móti Liktinstein - hesaferð 4-0.

Pætur Petersen skoraði tvær ferðir í fyrra hálvleiki, og í seinna hálvleiki skutu Adrian Justinussen og Arnbjørn Svensson hvør sítt mál.

Felags fyri allar tríggjar er, at hetta var fyrstu ferð, at teir gjørdu mál á A-landsliðnum.

Týskvøldið klokkan 19.15 spæla Føroyar aftur venjingardyst, og tað verður á Brøndby Stadion ímóti Danmark.

Dysturin verður vístur í sjónvarpinum.