Nato 75 ár

Nato hátíðarheldur 75 ára stovningardagin í høvuðsborgini í Brússel í dag.

14 fólk eru á røðaralistanum, skrivar Ritzau, sum hevur tosað við danska uttanríkisráðharran, Lars Løkke Rasmussen, sum verður við til hátíðarhaldið.

Hann sigur at verjusamgongan er ein sterkur felagsskapur.

- Nato er sterkari í dag samanborið við undanfarin ár. Nú brúka 20 lond, harímillum Danmark, í minsta lagi tvey prosent av bruttotjóðarúrtøkuni til verju og trygd, sigur Lars Løkke við tíðindastovnuna.

Málið hjá NATO er, at limalondini skulu brúka í minsta lagi tvey prosent av BTÚ'inum til verjuna.

Hóast limalondini, sum nú eru 32 í tali, kunnu hátíðarhalda verjusamgonguna, stendur hátíðarhaldið í skugganum av krígnum í Ukraina.

Danski uttanríkisráðharrin leggur dent á, at Ukraina framvegis hevur brúk fyri stórum hernaðarligum stuðli frá limalondunum.