Aron vann norðurlendskt gull

Aron D. Jacobsen vann í dag kappingina í beinsveiggi í Nordic Championships í Oslo, og er hetta fyrstu ferð, at ein føroyingur vinnur norðurlendskt gull í amboðsfimleiki.

Aron D. Jacobsen hevur vunnið fyrsta føroyska gullmerki í amboðsfimleiki í norðurlandameistarakappingini

Mynd: Hjálmar A. Dalsgarð

Emil Lisberg Jacobsen

Hilmar Jan Hansen

07.04.2024 - 16:32

Sjálvur hevði 26 ára gamli Aron D. Jacobsen ikki roknað við, at tað fór at ganga so væl, nú føroyska fimleikalandslið kappast í Oslo um vikuskifti. Gullmerki hansara er søguligt, tí hetta er fyrstu ferð, at ein føroyingur vinnur gull.

- Hetta er nógv tað størsta í føroyskum amboðsfimleiki nakrantíð, siga tey í Fimleikasambandinum, nú gullið í norðurlandameistarakappingini er veruleiki.

Aron D. Jacobsen vann innleiðandi kappingina í gjár og tryggjaði sær beinleiðis finalusess, og í finaluni gjørdi hann bart og fekk 13.600 stig framman fyri ein finna, sum á øðrum plássi fekk 13.533 stig.

Aron, sum allan sín uppvøkstur hevur gjørt fimleik í Havnar Fimleikafelag, lesur niðri og ger eisini fimleik í danska felagnum Gefion, men í Oslo um vikuskiftið umboðar hann sjálvandi Føroyar.

Hoyr útvarpssamrøðu við Aron D. Jacobsen:

2024-04-07-Aron-D_-Jacobsen