Um Tórshavnar kommuna ikki vil hava tjóðleikhúsið, so verður tað flutt

Landsstýriskvinnan í mentamálum, Sirið Stenberg, er klár at fara í løgtingið við einum uppskotið um, at mann kann fara at søkja grunnar um pengar til at byggja føroyingum eitt tjóðleikhús.

Tað einasta, ið hevur manglað, er at fáa leigusáttmálan á Eystaru bryggju upp á pláss. 

Men nú hevur havnarnevndin í Tórshavnar kommunu hálsað um, og mælir frá at gera leigusáttmála um økið á Eystaru bryggju, har ætlanin er, at tjóðleikhúsið skal vera. 

"Tað undrar, at býráðið fyrst hevur einmælt samtykt, hvar tjóðleikhúsið skal liggja, men so noktar at gera ein leigusáttamála fyri staðfestingina," undrast Sirið Stenberg, landsstýriskvinna í mentamálum.

Tjóðleikhús, arkitektakapping um tjóðleikhús

Kommunan sjálv valt staðsetingina

Landsstýriskvinnan í mentamálum ger greitt, at tað er Tórshavnar býráð sjálvt, ið er komið við staðsetingini á Eystaru bryggja, og at tað ikki er nakað, ið landsstýrið hevur ynskt. 

"Nú vænti eg, at málið kemur fyri aftur býráðið, og at býráðið stendur við sína samtykt. Men um tað ikki hendir, so hava vit eina heilt nýggja støðu," ásannar Sirið Stenberg, ið ikki avvísir at fara út um Havnina við tjóðleikhúsinum. 

"Um so er, at mann ikki vil hava tjóðleikhúsið í havn, so má mann fara at hyggja aðrastaðni, tí Føroyar skulu hava eitt tjóðleikhús."