Føroyar sum ferðamál: Metstórur áhugi

“Fólk síggja, at hetta er ein spennandi vinna, og tey síggja kanska eisini, at her er ein møguleiki at hava eina vinnu afturat tí vinnuni, tey longu arbeiða í.”

Tað sigur Súsanna Sørensen, samskipari og marknaðarleiðari hjá Visit Faroe Islands, sum hetta vikuskiftið skipar fyri árligu ferðavinnuráðstevnuni, har føroyskir og útlendskir ferðavinnuútbjóðarar møtast.

Hetta er 18. árið, at skipað verður fyri ráðstevnuni, sum í ár setir met við 135 luttakarum. Og tað er serliga talið av føroyskum veitarum, sum er vaksið nógv á ráðstevnuni.

Umboð úr 18 ymiskum londum
Av teimum 135 fólkunum á ráðstevnuni eru 57 umboð úr 18 ymiskum londum, til dømis Norðurlondum, Belgia, Týsklandi, Italia, Fraklandi, Kanada og USA.

Men heili 52 føroyskar ferðavinnufyritøkur eru eisini við á ráðstevnuni, har av fleiri eru nýggir útbjóðarar, sum eru við fyri fyrstu ferð, men eisini fyritøkur, sum hava verið virknar leingi, eru við á ráðstevnuni fyri fyrstu ferð.

Norðurlandahúsið var í gjár karmur um verkstovuna, har útlendskir keypararnir høvdu høvi at hitta umboð fyri ferðavinnuna í Føroyum. Í dag er útferð á skránni, áðrenn útlendsku gestirnir fara avstað aftur sunnudagin.

Hoyrið samrøðu við Súsonnu Sørensen frá Visit Faroe Islands her: