Politisk boð um at Lønardeildin skuldi ikki fara í Fasta gerðarrætt

Tað eru politisk boð, sum eru orsøk til, at Lønardeildin hjá Fíggjarmálaráðnum kortini ikki fer í Fasta gerðarrættin við fráboðaða verkfallinum hjá arbeiðarafeløgunum.

Lønardeildin hjá Fíggjarmálaráðnum hevur havt somu støðu sum Kommunala arbeiðsgevarafelagið, nevniliga at fakfeløgini hava ikki rætt til at lýsa verkfall fyri sínar limir, sum arbeiða hjá landinum. 

Við Dimma.fo sunnudagin segði Jan Mortensen, stjóri á Lønardeildini, at "fara fólk hjá landi ella kommunum í verkfall, verður hetta lagt fyri Fasta gerðarrættin sum skundmál."

Aksel V. Johannesen

Aksel V. Johannesen, løgmaður.

Kommunala arbeiðsgevarafelagið og Lønardeildini vóru eisini samd um at fara í Fasta gerðarrættin so seint sum í gjárkvøldið.

KAF fór í gerðarrættin stutt fyri døgurða, fyri síðani at taka málið aftur smáar tveir tímar seinni. Lønardeildin kom tó ongantíð so langt sum at leggja málið fyri Fasta gerðatrættin.

Spurdur um orsøkina til tað, svarar Jan Mortensen, stjóri á Lønardeildini, stutt:

- Hetta er politiskt.

Fleiri viðmerkingar hevur Jan Mortensen ikki.

Hann vísir til politiska myndugleikan, í fyrstu atløgu Ruth Vang, landsstýriskvinnu í fíggjarmálum, og í øðrum lagi til løgmann, Aksel V. Johannesen.

Ruth Vang, Sjúkrarøktarfrøðingar í verkfalli, tingfundur um uppílegging í verkfal

Ruth Vang, landsstýriskvinna í fíggjarmálum. (Mynd: Bjarni Árting Rubeksen)