Sjóuppmerking og vitaverk yvirtikin

Í dag, 1. juni, verða sjóuppmerking og vitaverk yvirtikin sum føroysk málsøki.

Hetta merkir millum annað, at frá í dag av verður Sjóvinnustýrið myndugleiki, tá ið ræður um sjóuppmerking og vitaverk.

Uttanríkis- og vinnumálaráðið skrivar á síni heimasíðu, at umsóknir viðvíkjandi sjóuppmerking, undir hesum umsóknir um at flyta sjóuppmerkingar, verða eftir 1. juni latnar Sjóvinnustýrinum.

Í hesum sambandi verður víst á, at umsókn viðvíkjandi sjóuppmerking skal latast Sjóvinnustýrinum seks vikur, áðrenn sjóuppmerkingin verður sett í verk. Eisini verður víst á, at sjóuppmerking ikki lógliga kann setast upp, broytast, flytast ella takast burtur uttan loyvi frá Sjóvinnustýrinum frammanundan. 

Fráboðanir um skaða, feil, brek, mangul og annað við vita, sjóuppmerking, siglingarskipan, fráboðanarskipan og annað verða framvegis latnar MRCC.