Spyr løgmann, hvat miðfyrisitingin kostar

Er miðfyrisitingin vorðin dýrari undir CEF-samgonguni samanborið við ABH-samgonguna, sum sat frammanundan?

Bárður á Steig Nielsen, sum var løgmaður í undanfarnu samgongu, hevur sett Akseli V. Johannesen, løgmanni, ein grein 52 fyrispurning, har hann spyr, hvussu nógv ársverk eru í aðalráðunum samanborið við einum ári síðani.

Hann spyr eisini, hvat árligi kostnaðurin av miðfyrisitingini við níggju aðalráðum er samanborið við, at tað framvegis vóru sjey aðalráð við eins nógvum ársverkum? 

Tinganes, 16:9

(Mynd: Bjarni Árting Rubeksen)

Skipaðu fleiri aðalráð

Bárður á Steig Nielsen vísir á, at tá ið CEF-samgongan var skipað, var haldføri tema. Men beinanvegin varð talið á landsstýrisfólkum og aðalráðum økt úr sjey upp í níggju. Løgmaður segði, at ætlanin var, at miðfyrisitingin skuldi ikki kosta fleiri almennar skattakrónur.

Bárður á Steig Nielsen sigur, at tað er lýst fleiri ferðir eftir fólki til nýggj størv í miðfyrisitingini. Hann spyr tí, hvussu nógv miðfyrisitingin er vaksin í krónum og nýggjum størvum í hesum valskeiðnum.