Hava verið á vatninum í París

Føroysku rógvararnir á danska OL-liðnum, Sára Maria Johansen og Sverri Sandberg Nielsen, eru komin til París og hava verið á vatninum í skullarunum. 

 - Her er risastórt. Tað líkist tí, sum vit eru von við, bara í nógv størri útgávu, segði Sára Maria Johansen við TV2 í gjár.

SÍ EISINI: OL-rógvararnir: Sára Maria og Sverri hvør sítt útgangsstøði

Sára Maria Johansen er partur av danska áttaranum, sum varð settur saman í november í fjør. Í roynd og veru var málið OL í 2028, men í mai megnaði báturin at rógva seg til leikirnar í París. 

 - Vit droymdu stórt um at vera her ... og vit skulu fara út at gera okkara allarbesta og skulu kunna hyggja hvørja aðra í eyguni eftir kappingina, segði Sára Maria Johansen við TV2 úr París.

Róð verður á Vaires-sur-Marne Nautical Stadium, sum liggur trý korter frá miðbýnum, og Sverri Sandberg Nielsen skal rógva innleiðandi umfar longu 27. juli. Áttarin leggur til brots ólavsøkudag við innleiðandi umfari.

SÍ EISINI: Olympiski dreymurin