Nýtt samband: Dómsvaldið skal framvegis vera danskt

Dómsvaldið skal framvegis vera danskt, um uppskotið hjá Sambandsflokkinum um eitt nýtt samband við danir verður veruleiki. 

Í gjár hevði Sambandsflokkurin tíðindafund undir yvirskriftini "Nýtt Samband", har flokkurin millum annað skjýtur upp, at Føroyar skulu hava víðkaðar rammur á uttanríkispolitiska økinum.

Sambandsflokkurin hevur lenað seg upp móti greinini "Ríkisfelagsskapurin 2.0," sum Kristian Joensen, námslektari á Fróðskaparsetri almannakunngjørdi saman við Bárði Larsen, útbúgvingarleiðara í løgfrøði á Fróðskaparsetri Føroya, í apríl.

Men í sínari greining, so leggja løgfrøðingarnir eisini upp til, at rættarskipan og dómstólar eiga at vera føroyskir. Men har er Sambandsflokkurin ikki samdur.