Regin verður stjóri í stórhøllini

Regin W. Dalsgaard er 40 ára gamal, hevur drúgvar royndir úr vinnulívinum og er útbúgvin í altjóða sølu og marknaðarføring. 

Eitt av aðalmálunum hjá nýsetta stjóranum er at fáa virksemi í stórhøllina alt árið, sigur hann. 

Eftir ætlan skal stórhøllin við Tjarnir lata upp síðst í januar 2025, og komandi hálva árið fer stjórin at fáa praktisk viðurskifti uppá pláss, umframt at bjóða høllina út í altjóða høpi.

Stórhøllin við Tjarnir, sum er í trimum hæddum, hevur eina samlaða gólvvídd á 8100 fermetrar. Hon er ætlað til alt frá landsdystum til stórar konsertir og onnur tiltøk, so sum samfelagsmøtir ella ráðstevnur.