Sendimaðurin fer til Ísraels í morgin

Petur Petersen, sum 1. septembur tekur við starvinum sum sendimaður Føroya í Ísrael, fer eftir ætlan til Ísraels í morgin.

- Sum er, fari eg avstað, sigur Petur Petersen í stuttari viðmerking.

Hann skal flúgva til París og viðari haðani til Tel Aviv í morgin.

Air France hevur avlýst flúgving sína til Ísraels í dag, men enn er óvist, hvussu verður í morgin.

- Eg havi enn einki frætt um, at ferð mín er avlýst, sigur Petur Petersen.

Hann tekur, sum sagt, við 1. septembur og hevur ongar viðmerkingar til støðuna í Ísrael.

- Torført er at gera metingar, og støðan broyist skjótt harniðri, sigur Petur Petersen.

Føroyar hava havt sendistovu í Ísrael í nøkur ár, hon heldur til í Tel Aviv

Føroyar hava ongan stovn, sum metir um trygdina í teimum einstøku londunum, og føroyskir myndugleikar halda seg tí til metingar hjá donskum myndugleikum slíkum viðvíkjandi.