SPD vann landspartavalið í Brandenburg

Flokkurin hjá týska samveldiskanslaranum Olaf Scholz, sosialdemokratiski SPD, vann í gjár týska landspartavalið í Brandenburg. 

Tað vísa almenn úrslit.

Sambært valúrslitunum frá valmyndugleikanum í gjárkvøldið, fekk SPD 30,9 prosent av atkvøðunum, og Alternativ für Deutschland (stytt AfD) fekk 29,2 prosent og gjørdist næststørsti flokkur.

Báðir flokkar høvdu við framgongd samanborið við seinasta landspartaval í 2019, tá ið SPD fekk 26,2 prosent og Alternativ für Deutschland 23,5 prosent.

Hans-Christoph Berndt

Hans Christoph-Berndt var høvuðsvalevni hjá AfD. Flokkurin gjørdis nummar tvey við 29,2 prosentum av atkvøðunum. (Mynd: Reuters/Ritzau Scanpix)

Javnir undan valinum 

AfD-flokkurin hevði vónir um at vinna sigur, eftir at flokkarnir báðir lógu nærum javnir í meiningarkanningum vikurnar undan valinum.

AfD er kritiskur mótvegis ES, og verður lýstur sum høgrapopulistiskur, nationalkonservativur við sterkum høgraradikalum eindum.

Flokkurin er m.a. ímóti tilflytarum og grøna orkuskiftinum.

Seinastu árini hevur flokkurin staðið seg betur. Á valinum í 2017 gjørdist hann triðstørstur í Týsklandi, og í september gjørdist hann størstur á landspartavalinum í Thüringen og næststørstur í Sachsen.

Týska fregnartænastan BfV hevur síðani 2021 havt eftirlit við flokkinum, sum er undir illgruna fyri at vera høgravíðgongdur.