USA letur Ukraina 53 milliardir kr. í hernaðarstuðli

Amerikanski forsetin Joe Biden hevur almennakunngjørt, at Ukraina fær átta milliardir dollarar í hernaðarstuðli aftrat. 

Tað boðar amerikanski forsetin frá, nú ukrainski forsetin, Volodymyr Zelenskyj, er á vitjan í USA.

Átta milliardir dollarar svara til 53 milliardir krónur.

Ukraina skal vinna kríggið

Biden sigur, at hernaðarstuðulin skal hjálpa Ukraina at vinna kríggið móti russisku deildunum, sum hava gjørt innrás.

Stuðulin merkir m.a., at ein sending við fjarstýrdum bumbum, sum røkka upp í 130 km, fer til Ukraina, og aðrar rakettir til at leypa á russiskar deildir við størri frástøðu.

Ukrainski forsetin, Volodymyr Zelenskyj, skal hitta amerikanska forsetan Joe Biden og varaforsetan, Kamalu Harris, í Hvítu húsunum seinni í dag.