Búskaparráðið roknaði skeivt

(dagført klokkan 09:31)

Búskaparráðið hevur roknað skeivt, tá tað snýr seg um hall í fíggjarlógini upp á 480 milliónir krónur, sum tað stóð at lesa í heystfrágreiðingini hjá Búskaparráðnum.

Tað sigur landsbankin. 

Búskaparráðið hevur ikki tikið ætlaðu broytingina um at hækka mørkini í Búskapargrunnin við 200 mió. kr. við í metingini. Haraftrat hevur ráðið tikið við støðlaðar íløgur fyri 50 mió. kr.

Búskaparráðið hevur í síni meting tikið útgangsstøði í fíggjarkørmunum í vár, tað vil siga, at tað er ikki fíggjarlógin fyri 2025, sum lá til grund fyri metingini. 

Harmast mistakið

"Tíverri er ein feilur íkomin orsakað av vantandi gjøgnumskygni í reglunum fyri uppseting av fíggjarlóg. Tær 200 milliónir krónurnar eru trektar frá tvær ferðir í metingini av úrslitinum í heystfrágreiðingini. Hesin feilur er nú rættaður í frágreiðingini. Metta úrslitið er tó framvegis eitt hall", sigur Búskaparráðið. 

Metingin í heystfrágreiðingini skal tí ikki vera 480 milliónir krónur, men ístaðin 280 milliónir krónur.

Búskaparráðið sigur seg harmast mistakið, og hevur tikið stig til at styrkja tilgongdina í sambandi við at fáa til vega talgrundarlagið fyri metingina av úrslitinum í landsins fíggjarlóg.