Nógvar umsóknir um at fáa arbeiðsmarknaðargjøld endurgoldin

Taks hevur nógvar umsóknir liggjandi fyri árini fyri 2019. 

Tær vera viðgjørdar, tá niðurstøða er gjørd um afturrindan og um tíðarskeiðið, afturrindað verður fyri. 

Tað sigur Ruth Vang, landsstýriskvinna, í svari til Grím Sundstein, løgtingsmann.

Hann spurdi um afturrindan av arbeiðsmarknaðargjaldi, sum er goldið í ósamsvari við norðurlendska sáttmálan um sosiala trygd árini fyri 2019. 

Grímur Sundstein

Grímur Sundstein. 

Hann spurdi um fyrningarfreistina, sum er fimm ár. 

Ruth Vang sigur, at Heilsumálaráðið ger lógaruppskot, sum skal fáa ráðnum heimild til at afturrinda teimum heilsutrygdargjald, sum fyri sama tíðarskeið hava goldið bæði heilsutrygdargjald, og eru kravd eftir sosialum gjøldum í øðrum Norðurlandi.

Avgerð um at rinda aftur arbeiðsmarknaðargjøld og um, hvussu langt farið verður aftur í tíð, verður ætlandi tikin við støði í sama leisti, sum verður brúktur til at rinda aftur heilsutrygdargjald.