Biðja fíggjarnevndina um stuðul til flogfelag

Felagsskapurin MAF Føroyar biður fíggjarnevndina um at stuðla arbeiðnum hjá felagnum við 250.000 krónum.

MAF er eitt flogfelag, stovnað eftir seinna heimsbardaga, sum í dag hevur 138 flogfør, ið flúgva í 28 londum.

Felagið flýgur fyri NGO-felagsskapir sum Unicef, Reyða Kross, Folkekirkens Nødhjælp, Luthersk Mission, Mercy Ships, World Food Program, WHO og fleiri enn 2000 aðrar felagsskapir.

Sambært MAF tryggjar felagsskapurin effektivan flogflutning, har í flestu førum ongin annar flýgur. Flogið verður við heilivági, heilsustarvsfólki, prestum, trúboðarum, lærarum og øðrum hjálparfólkum.

MAF Føroyar, sum er partur av donsku deildini, byrjaði í 1989. 

Í umbønini til fíggjarnevndina hjá løgtinginum um stuðul upplýsir felagið, at tørvur er á pengunum, nú ein føroyingur fer í starv sum flogskipari við MAF.