Umhvørvisstovan má siga nei

Umhvørvisstovan er komin í eina heldur løgna støðu, nú myndugleikin, sum bæði stendur fyri at minka um føroyska CO2-útlátið og sum roynir at gera Føroyar grønari, noyðist at nokta Effo at byggja stóru vindmyllulundina Eysturlund, sum ætlanin var at byggja í Lambahaganum.

Ætlanin hjá Effo var at byggja eina risastóra vindmyllulund í Lambahaganum og at leggja ein elkaðal úr Lambahaganum til Fuglafjarðar, har streymurin skal brúkast til at gera damp til maskinurnar hjá Havsbrún, sum í løtuni brúka tungolju til at gera dampin.

Men av tí at umsóknin ikki lýkur treytirnar í lógini, má Umhvørvisstovan nokta Effo loyvi.

Ein av stóru orsøkunum er spurningurin, um talan er um eitt elnet ella ikki. Sambært Effo er talan ikki um eitt net, sambært Elveitingareftirlitinum er tað. Og tá tað er myndugleikin, sum eigur seinasta orðið, ja, so er tað, í fyrsta umfari í øllum førum, tulkingin hjá Elveitingareftirlitinum, sum er avgerandi.

Effo kann kæra málið til kærustovnin, men kann eisini velja at fara í rættarskipanina við málinum, um felagið ikki er samt við myndugleikan.

Lurta eftir innslagnum, sum var í tíðindunum á middegi í dag.