Arktiski sendimaðurin fer í annað starv

Arktiski sendimaðurin Tobias Elling Rehfeld fer nú í annað starv.

Rehfeld, sum hevur sitið sum arktiskur sendimaður í hálvt annað ár, verður í staðin stjóri fyri trygd og átøkum í danska verjumálaráðnum.

Hesum boðar hann sjálvur frá á LinkedIn sambært grønlendska kringvarpinum KNR.

Hetta kemur ikki óvart á, nú avtalað er, at grønlendska landsstýrið skal velja næsta arktiska sendifólkið.

Valið av arktiskum sendifólki skal eisini góðkennast av donsku stjórnini og av føroyska landsstýrinum.

Enn er einki komið fram alment um, hvønn grønlendska landsstýrið ætlar sær at velja sum arktiskt sendifólk.