Meginøkið fingið streymin aftur

Umleið klokkan 16.40 fóru Havnin og bygdirnar rundanum Havnina í svart. Í Norðurøkinum fór streymurin eina løtu fyrr.

Sev sigur, at ein feilur er staðfestur á koblingsstøðini í Skálabotni, men at arbeitt verður við at starta uppaftur.

- Tað kann taka millum ein til tveir tímar at fáa alt upp at koyra aftur, men tað vísur seg at vera torført at fáa samband millum tær ymisku koblingsstøðirnar, segði vakthavandi hjá Sev, Eirikur Norðberg.

Í Vágum, Streymoy, Sandoy og størsta partinum av Eysturoy er streymurin komin aftur, men tað vísti seg at vera eitt sindur truplari at fáa lív í høvuðsstaðin, men um sjey-tíðina var líkt til, at streymurin er komin aftur í høvuðsstaðnum eisini.

Enn mangla Norðoyggjar at fáa streymin aftur, men Sev væntar, at umleið klokkan átta í kvøld er streymurin eisini komin aftur har tá.

Streymslitið hevði við sær, at til bar millum annað ikki til at fáa fatur á læknavaktina - 1870 - og tí mælti Pero Soré, vakthavandi lækni á læknavaktini, á fólk, sum hava tørv á hjálp, at møta upp á sjúkrahúsunum kring landið, og annars ringja 112 fyri akuttari hjálp.

Steinar Eirikstoft, stjóri í Sjúkrahúsverkinum, sigur, at tað eru skipanir, sum eiga at taka yvir, tá streymurin fer, men í hesum føri var eitt óvæntað niðurbrot hent inni á dátuskipanini, sum stýrir telefonlinjurnar inn og út í Landssjúkrahúsinum.

Stjórin vissaði tó fyri, at allar aðrar skipanir í Landssjúkrahúsinum virka sum teir skulu.