VAR á veg til Føroya

Tá kappingarárið í fótbólti byrjar í 2026 verður VAR brúkt í Betrideildini hjá monnum og partvís í kappingini um Løgmanssteypið.

- Vit hava arbeitt við hesum møguleika í eina tíð.

Eftir ætlan fara vit at gera nakrar royndir í ár, og so taka vit VAR av álvara í brúk, tá kappingarárið 2026 byrjar, sigur Lassin Isaksen, dómaraleiðari hjá Fótbóltssambandi Føroya við heimasíðuna hjá sambandinum.

VAR stendur fyri Video Assistant Referee og verður brúkt, tá dómarin ivast í, hvat hann skal døma.

Til dømis er VAR brúkt, tá staðfestast skal við at brúka videoupptøkur, um brotsspark ella rangstøða eru.

Bara í einum dysti

Sum skiltst verður VAR brúkt í einum dysti í hvørjum umfari í Betrideildini hjá monnum í 2026.

Tá kappingin endar, hava øll liðini spælt eins nógvar dystir við VAR.

- Fyri trimum árum síðani gjørdu vit eina roynd á Tórsvølli, har tvey ungdómslið hjá HB spældu.

Føroysku dómararnir, sum dømdu dystin, fingu møguleikan at royna VAR. 

Tað eydnaðist so mikið væl, at vit alt fyri eitt avgjørdu at arbeiða víðari við hesi ætlan, sum nú nærum er komin á mál, sigur Lassin Isaksen.