Skulu nú í holt við Taldgildu Føroyar 2.0

Nógv stór fet eru tikin, síðan Talgildu Føroyar vórðu skipaðar á Føroya Gjaldstovu í 2015. Fyrsta heildarætlanin, sum hevði við talgilding av føroyska samfelagnum at gera, varð gjørd fyri tíðarskeiðið 2015-2020, og so varð ein nýggj heildarætlan gjørd fyri tíðarskeiðið 2023 til 2025.

Nú eru vit komin til 2025 og tí eru næstu fetini løgd í eina nýggja heildarætlan, sum fer víðari við teimum ætlanum, sum arbeitt hevur verið við higartil, og sum so eisini leggur nýggjar ætlanir afturat. 

Henda heildarætlanin skal ganga fyri tíðarskeiðið frá 2025 til 2027, men lógaruppskotið hevur fingið heitið uppskot til løgtingslóg um Talgildu Føroyar 2.0 (Heildarætlan fyri 2025 til 2027).

Eitt av teimum fyrstu heilt stóru málunum, sum Talgildu Føroyar loystu úr lagdi var Samleikin, sum í dag er innritingarskipan til peningastovnarnar og talgild undirskrivarskipan, og hon er nú fast inventar hjá 46.000 brúkarum, stendur at lesa í faldaranum, sum er gjørdur í sambandi við nýggju heildarætlanina og nýggju verklagslógina. 

Nógv tað mesta av tí, sum er gjørt higartil, vendir sær til tey privatu, men nú er ætlanin at gera meira við tann vinnuliga partin, sigur Nicolai Balle, sum er deildarstjóri í Talgildu Føroyum, ið enn er ein partur av Føroya Gjaldstovu.

Vit fingu orð á Nicolai Balle seinnapartin og fingu hann at seta orð á nøkur av teimum viðurskiftum, sum nýggja heildarætlanin snýr seg um.