Grønland fer til USA at samráðast - um fótbólt

Grønlendska fótbóltssambandið KAK skal í næstum til USA at samráðast um at gerast limur í CONCACAF, sum er fótbóltssamgongan hjá londum í Norðuramerika, Miðamerika og Karibia.

Tað boðar grønlendska fótbóltssambandið frá í tíðindaskrivi.

KAK søkti í mai í fjør alment um at gerast limur í CONCACAF, og beint fyri jól fingu grønlendingar eina innbjóðing um at koma til samráðingar í Miami, har CONCACAF hevur sína høvuðsskrivstovu.

Kenneth Kleist, formaður í grønlendska fótbóltssambandinum, leggur dent á, at fundurin í Miami hevur onki at gera við politisku støðuna, sum er íkomin í sambandi við Grønland.

Hann hevur góðar vónir um, at Grønland kann fáa limaskap í CONCACAF. Hann vísir á, at sum er eru 10 av limalondunum ikki limir í olympiska felagsskapinum IOC, og 12 av limalondunum eru antin fyrrverandi hjálond ella hoyra undir onnur lond.

Umsóknin hjá KAK verður stuðlað av danska fótbóltssambandinum DBU og av grønlendska ítróttasambandinum.