Aftur eitt kaðalbrot í Eystrasalti

Ein mynd av skipaðum hybridálopum er komin til sjóndar, sigur ein svenskur verjugreinari um seinastu kaðalbrotini í Eystrasalti.

Enn eitt kaðalbrot var um vikuskiftið, og svenskir myndugleikar hava lagt hald á bulgarska skipið Vezhen, sum teir hava illgruna um framdi sabotasjuna.

- Hetta er ikki eitt óhapp. Eg haldi, at hetta er nokkso skipað. Tað er mín meining, hóast vit ikki vita, hvat svensku kanningarnar fara at vísa, sigur greinarin, Jens Wenzel.

Hann hevur ikki álit á frágreiðingini frá skiparanum á Vezhen sum segði, at eitt akker var loysnað í ringum veðri.

Fyrrverandi verjuleiðarin í svenska verjumálaráðnum, Joakim Paasikivi, heldur, at tað kann vera ein aktørur uttanífrá, sum elvdi til kaðalbrotið, antin av tilvild ella við vilja, ella natúrligar orsøkir.

Verður tosað um sabotasju, er Russland helst sabotørurin, heldur hann.

Eitt lettiskt sjónvarps- og útvarpsfelag eigur sjókaðalin, sum gongur millum Gotland og Ventspils í Lettlandi.

Skaðin varð fráboðaður sunnudagin. Sama dag fóru svenskir myndugleikar undir at kanna málið.