Mildrid á Lógv bíðar enn

1. mai í fjør varð Mildrid á Lógv frítikin frá tænastu sum leiðari á Skálagarði í Klaksvík og send til hús. Í januar í ár varð uppsøgnin ógildað og Almannaverkið kallaði hana á fund um málið, tí hon slapp ikki aftur í starvið sum leiðari. Hon fekk bjóðað annað starv í Almannaverkinum ella eina frágaringaravtalu.

Og lítið er hent síðan.

Næstsíðsta fríggjadag boðaði Sigmund Poulsen, advokatur, vegna Mildrid á Lógv frá, at hon hvørki ynskir annað starv ella fráfaringaravtalu, men vil sleppa til arbeiðis aftur sum leiðari á Skálagarði sum skjótast, nú uppsøgnina er ógildað.

Sigmund Poulsen sigur við Kringvarpið, at tey enn ikki hava hoyrt aftur frá Almanna- og Mentamálaráðnum og eiheldur er nakað ætlanarskriv um uppsøgn komið.

Tískil situr Mildrid á Lógv enn og bíðar eftir eini avgerð. Sigmund Poulsen sigur seg hava frætt, at eitt svar kemur hesa vikuna.

Edvard Heen, stjóri á Almannaverkinum, sigur, at nú tosa advokatarnir hjá Mildrid á Lógv og Almannaverkiunum saman, og at tey vóna at koma til eina niðurstøðu í vikuni.