Eingin útlendskur peningastuðul til valstríð í Danmark

Fyrr í vikuni samtykti grønlendska landstingið, at tað skal ikki vera loyvt hjá teimum, sum stilla upp til val, at taka ímóti útlendskum pengum til valstríð og annað. Hetta skal fyri at forða útlendskari ávirkan á grønlendska valið, sum verður 11. mars.

Danski forsætisráðharrin, Mette Frederiksen, segði tá, at hon helt tað vera ein skilagóð avgerð, sum Fólkatingið eisini átti at umhugsað at sett í verk.

Og nú sær út til, at Fólkatingið fer at gera júst tað. Ein breiður politiskur meiriluti á Fólkatingi heitir nú á stjórnina um skjótast tilber at leggja fram eitt lógaruppskot, sum skal forbjóða útlendskum peningaligum stuðli til politiskar flokkar og valevni. 

Í hesum meirilutanum eru stjórnarflokkarnir og SF, Radikali flokkurin, Eindarlistin, Alternativið, Konservativi flokkurin og Danmarksdemokratarnir, skrivar Ritzau.