Ávara um jarðskjálvta í Íslandi

Íslendska veðurstovan sigur, at tað er sannlíkt, at ein sterkur jarðskjálvti er á veg í Brennisteinsfjøllunum. 

Tað skrivar íslendska kringvarpið RÚV.

Í morgun varð ein jarðskjálvti í økinum máldur til 2,8 á Richter-stiganum, og roknast kann við upp aftur sterkari skjálvtum, sigur veðurstovan, sum heitir á fólk um at fyrireika seg.

Brennisteinsfjøllini eru millum Hafnarfjørðin og Tórlakshøfn, ikki langt frá Reykjavík, har jarðskjálvtin í morgun eisini sást aftur í mátingum.

Íslendska veðurstovan sigur, at í 1929 og 1968 vóru jarðskjálvtar í Brennisteinsfjøllunum, sum komu upp á 6 á Richter-stiganum. Skjálvtarnir koma av, at norðuramerikansku og eurasisku pláturnar førka seg ímóti hvørji aðrari, og við umleið 50 ára millumbilum førir tað til jarðskjálvtar.