Eingin ætlan at strika grein 266 b

Landsstýrismaðurin í lógarmálum, Bjarni Kárason Petersen, hevur ongar ætlanir um at strika grein 266 b í revsilógini.

Tá munnligir fyrispurningar vóru í tinginum í dag,  spurdi Steffan Klein Poulsen, løgtingsmaður, hvat landsstýrismaðurin heldur um at taka grein 266 b í revsilógini av.

Kjakið um grein 266 b er kyknað aftur, eftir at Føroya rættur í síðstu viku dømdi tveir menn sekar fyri at bróta ásetingina.

Í øðrum málinum var ein maður ákærdur fyri millum annað at skriva á Facebook, at kynsvilla er sálarsjúka.

Hin maðurin var ákærdur fyri at skriva niðrandi um samkynd á Vágaportalinum.

Báðir skulu rinda 5.000 krónur í bót. 

Landsstýrismaðurin heldur tað vera gott, at grein 266 b støðugt verður viðgjørd, men ongar ætlanir eru um at strika hana:

Grein 266 b í revsilógini sigur, at tann, sum alment ella við størri útbreiðslu í hyggju setir fram útsøgn ella boðskap, ið hóttir, spottar ella eyðmýkir persónsbólk orsakað av rasu, húðarliti, tjóðskaparligum ella etniskum uppruna, trúgv, kynsligum samleika ella breki, verður revsaður við sekt ella fongsli í upp til tvey ár.