Hví hvørva summar barnarøðir úr VIT-appini?

Kringvarpið fær javnan fyrispurningar frá hyggjarum og lurtarum, sum sakna onkra av okkara væl umtóktu røðum á VIT-appini.

Støðan er tann, at tá Kringvarpið ger avtalu um at keypa røðir frá útlendskum veitarum, so er hon tíðaravmarkað.

Tað merkir, at vit einans hava rætt at sýna sendingarnar í eitt ávíst tíðarskeið.

Av tí at fíggingin til barnatilfar er avmarkað, so kunnu vit ikki endurnýggja allar avtalur. Tað er ein áhaldandi meting, vit mugu gera, hvørjar avtalur skulu endurnýggjast, og hvørjar avtalur skulu gerast um nýggjar sendirøðir fyri at tryggja eina ávísa útskifting.

Vit eru sera hørm um støðuna, men hetta snýr seg um upphavsrætt, sum vit sjálvandi mugu virða.

Eg kann tó kunna um, at nýggjur biograffilmur til børn kemur seinni í ár, og annað gott barnatilfar verður eisini tøkt til tey smáu – eitt nú góða gamla Mumi-røðin, sum hevur frumsýning í sjónvarpinum 13. mars, og tá verður røðin sjálvandi eisini á VIT-appini. 

Barbara Samuelsen, leiðari á Mentan í KVF