Uttanlandsnevndarlimur: Hetta er surrealistiskt

Lars Løkke Rasmussen vitjar í Føroyum sum uttanríkisráðharri og var í kvøld til døgurða saman við uttanlandsnevndini og Høgna Hoydal, landsstýrismanni í uttanríkismálum.

Ein av nevndarlimunum í uttanlandsnevndini er Liljan Weihe úr Tjóðveldi. Hon skrivar soleiðis á Facebook um hendingarnar í kvøld: 

"Tað var púra surrealistiskt og samstundis so hóskandi at sita til borðs saman við landsstýrismanninum í uttanríkismálum, Høgna Hoydal, uttanríkisráðharranum, Lars Løkke Rasmussen, limum í uttanlandsnevndini og embætisfólkum úr londunum báðum í kvøld. Øll líka skelkað.

Prátið snúði seg sjálvsagt um ræðandi og ófólkaliga atburðin hjá amerikanska forsetanum og varaforsetanum nú Zelenskyj vitjaði Hvítu húsini í dag.

Amerikanski forsetin og varaforsetin lupu á ukrainska forsetan, Zelenskyj, í beinleiðis sjónvarpi. Niðurgjørdu og skeldaðu mannin, sum í trý ár hevur stríðst fyri frælsi, friði og fólkaræði - ikki bara í Ukraina, men øllum vesturheiminum.

Heimurin er broyttur. Vit mugu læra at navigera í hesum broytta heimi, nú vanligt diplomati er koyrt til viks fyri bølla-metodur, lygnir og beinleiðis ákærandi álopum.

Vit mugu standa saman í Europa. Og standa saman við og stuðla Ukraina við øllum vit eru ment."