Iran herðir hijab-eftirlit

Tað nýggjasta er, at myndugleikarnir í Iran nú eru farnir at brúka dronur og aðra framkomna tøkni, so eitt vakið eyga kann verða hildið við konufólkunum.

Eisini er komin ein nýggj app, Nazer, ið ger tað skjótt og lætt hjá fólki at boða myndugleikunum frá, um onkur er, sum brýtur sokallaðu hijab-lógina í muslimska landinum.

Tað vísir ein ST-frágreiðing, sum varð almannakunngjørd fríggjadagin.

Serliga í høvuðsstaðnum Teheran verða dronur brúktar saman við tøkni, ið ger tað møguligt at kenna andlit aftur.

ST staðfestir, at iransku myndugleikarnir við hesum hava tikið ógvuslig stig í royndunum at kúga kvinnur og teirra rættindi.