Ukraina og Russland samráðast við USA

Ein sendinevnd úr Ukraina og ein úr Russlandi eru í Saudiarabia, og tær hava hvør sær samrøður við umboð fyri USA og kríggið í Ukraina.

Eftir ætlan verður ukrainska sendinevndin verandi í Saudiarabia, og fer hava fleiri samrøður við USA, sigur Serhiy Leshchenko, sum er ráðgevi hjá Zelenskyy, forseta, við ukrainsku tíðindastovuna Unian.

USA og Ukraina høvdu ein undanfund í gjár, og ukrainski verjumálaráðharrin, Rustem Umerov, letur væl at tí, sum kom burturúr.

Ukrainski ráðgevin, Serhiy Leshchenko, sigur, at samráðingarnar kunnu vara í fleiri mánaðir.

Hann sigur, at samrøðurnar við USA eru um vápnahvíld, undirstøðukervi og at veita skipum trygd.